Азаттық тілшісі Нұргүл Тапаеваның айтуынша, Адам құқықтары жөніндегі бюро алматылық кеңсесіне келген тілшілердің алдынан белгісіз әйел адамдар шығып, камераларын ұрып, тартып алғандары да болды.
«Төрт-бес әйел операторымызға жабылды. Телефонымды қосқанымды көріп, маған қарай бұрылды. Қолымнан қысып, шашымнан тартты. «Жіберіңдерші мені» деп жалындым. Оператордың да қолын тырнап тастады. Мен куәгерлердің сөздерін диктафонға жазып алдым. Куәгерлер бар. Біздің камерамызды сындырып тастады», - деді журналист.
Оның айтуынша, әйелдер пресс-конференцияның өтуіне наразы болған. Олар өздерін таныстырмаған. Тек көп балалы әйел екендіктерін айтқан. Оқиға жарты сағатқа созылған.
«Өзімнің көргенім, әйелдердің біреуін ғана учаскелік полиция көлігіне салып алып кетті. Қалған жиырма шақты әйелдің қайда кеткенін білмеймін».
Оқиға орнына келген полиция журналистердің арыз-шағымдарын қабылдап, тергеу жұмыстарын бастады.
