Алты құрлықты аузына қаратқан Америка құрама штатынан жер жаһанға тарайтын «Freedom FM» радиосынан «Qazaq Time» бағдарламасы ашылғанын бұған дейін сүйіншілеп жазған едік. Нью-Йорктан желіге шығатын радио аптасына бір мәрте қазақтың күмбірлі күйі мен әсем сазын, ұлттық құндылықтарын насихаттайтын хабар таратады. Осынау ақжолтай бастаманы қолға алған Нью-Йорк қаласында тұратын қазақ баласы Данияр Қожан. Күні кеше Алматыға келген Даниярмен жүздесіп, әңгімелесудің сәті түскен еді.
