"Бүгінгі күні мемлекеттік шекарадан арақашықтықты айқындай отырып, шекара маңындағы аймақта ауыл шаруашылығы жерлерін шетелдіктерге және шетелдіктермен немесе азаматтығы жоқ адамдармен некеде тұрған (ерлі-зайыпты) азаматтарға беруге тыйым салынған. Халықтың жеке малын елді мекендердің маңында күтіп-бағу мұқтаждықтары мемлекет мұқтаждықтары санатына жатқызылды, бұл оларды мәжбүрлеп алып қоюға заңнамалық негіз береді", - деді ҚР Ауыл шаруашылығы министрі Сапархан Омаров.
Министрдің мәлімдеуінше, бүгінде жердің пайдаланылуы мен қорғалуын мемлекеттік бақылауды жетілдіру бойынша заң жобасы әзірленді. Ол бойынша пайдаланылмайтын ауыл шаруашылығы жерлерін тексеру кезеңдері мен алып қою мерзімдерін 3 жылдан 1 жылға дейін қысқарту көзделген.
"Ауыл шаруашылығы жерлерінің тиімді пайдаланылуын мемлекеттік бақылауды күшейту мақсатында 2019 жылы Жер кодексіне Жерді қашықтықтан зондтау деректерін пайдалану жөнінде өзгерістер енгізілді. Яғни, пайдаланылмайтын жерлерді анықтау үшін енді жүйелі бақылау, жерүсті түсірілімдерін жасау, зерттеп-қарау, түгендеу нәтижелерімен қатар, ғарыштық мониторинг нәтижелері де пайдаланылатын болады", - дейді ол.
Айта кетейік, елордада Жер реформасы жөніндегі комиссияның 1-ші отырысы өтіп жатыр. ҚР Премьер-Министрінің орынбасары Ералы Тоғжанов төрағалық еткен комиссия құрамы 80 адамнан тұрады. Оның 60 пайызы азаматтық оғам өкілдері және тәуелсіз сарапшылар.
Еске сала кетсек, ҚР Президенті Қасым-Жомарт Тоқаев Ұлттық қоғамдық сенім кеңесінің 5-отырысында бір айдың ішінде жер реформасы жөніндегі комиссияны құрып, оның құрамына аграрлық сектордың беделді өкілдерін және жер мәселесін жетік білетін сарапшыларды қосуды тапсырған болатын.
#жер #реформа #ереже #пайдалану #қолдану #АШМ #СапарханОмаров
