Суыт хабарды Алматы облысы денсаулық сақтау басқармасының баспасөз қызметі растады. Осыған дейін бір апта бойына екі оқушы қыз жансақтау бөлімінде жатқан.

"Тоғыз жастағы науқастың жүрегі тоқтап қалғаны белгілі болды. Тағы біреуі - сегіз жастағы зардап шегуші әлі комада, ол жасанды тыныс алу аппаратына қосылған. Жағдайы өте ауыр деп бағаланады. Үшінші оқушы ем-дом алуда. Ал төртіншісі аздап шошып қалған. 54 жастағы жүргізуші қамауға алынды. Бұл факт бойынша сотқа дейінгі тергеу амалдары жүргізілуде", делінген хабарламада.

2 наурызда кешке 54 жастағы УАЗ жүргізушісі мас күйінде жол шетінде тұрған төрт қызды қағып кетті. Жүргізуші айықтырғышқа, ал қыздар ауруханаға жөнелтілді.

"Көлік құралдарын алкогольдік мас күйде басқарған адамдардың жол қозғалысы немесе көлік құралдарын пайдалану ережелерін бұзуы, байқаусызда адам денсаулығына ауыр зиян келтіру" бабы бойынша қылмыстық іс қозғалды. Жүргізуші уақытша ұстау изоляторына қамалды.

Қасым-Жомарт Тоқаев бұл оқиғаны тергеуді жеке бақылауына алды.