Жаппай төбелесте мерт болған Абзад Өткіров ісіне қатысты тергеу әділ жүргізілуіне күмән бар. Дер кезінде іс-әрекет қабылданса 17 жастағы жігіттің өмірін сақтап қалуға болар ма еді деп өкінеді анасы.
"Мүмкін ертерек әрекет қылған кезде балам аман қалатын ба еді? Өінем сіздерден, барлығы жазасыз қалмасын. Жазасын алсын", - дейді Гүлбаршын Қадырқызы.
Ағасы Алмас Өткіров қылмыстық іс басқа бап бойынша тергеліп жатқанына наразы. Іске қатысы бар жиырмаға жуық адамның тек төртеуі күдікті ретінде қамауға алынған екен.
"XXI ғасырда жауыздықпен өлтіру және топ болып өлтіру бабы бойынша қатаң түрде жазалауды сұраймыз. Қасым-Жомарт Тоқаев мырза! Өзіңіз жеке қадағалауыңызға алып, сол жерде төбелеске қатысқан бүкіл кінәлілердің бәрі жазалануын қалаймыз", - деді Өткіров.
