Осы институттың асханасында 54 курсанттың уланып, қалалық ауруханаға жеткізілді деген мәлімет тарады.
Ұлттық ұланның баспасөз қызметіндегілер редакция жолдаған сауалхатта 25 қарашаға қараған түні 62 курсанттың жүрегі айнып, шағымданғанын хабарлады. Диагнозды растау мақсатында төрт студент қалалық № 1 аурухананың жұқпалы аурулар бөліміне жеткізілген. Оларға тағам токсикоинфекциясы деген диагноз қойылған. Қалған студенттер оқуын жалғастырған.
"Бастапқыда студенттер Әскери институттың асханасында тамақтанып, уланды деген нұсқа айтылды. Бірақ сараптама нәтижесі бойынша ол нұсқа расталмады. 300 курсант пен асхананың 21 қызметкерінен жұқпалы аурулар тудыратын қоздырғыш анықталмады. Курстанттар уланып қалды деген күні демалыс болды, медициналық көмекке жүгінген 62 курсанттың 12-сі сыртта тамақтанған. Бұл олардың Әскери институттан тыс жерде уланып қалуы мүмкін екенін жоққа шығармайды", - деді баспасөз қызметінің өкілдері.
Ұлттық ұландағылар осы дерек бойынша қызметтік тергеу басталғанын айтты.
