Төрт айдан бері Нұр-Сұлтанда үйқамақта отырған Серікжан Біләш (құжат бойынша - Бияш) ісі бойынша алдын ала сот отырысы таңертеңгі сағат 11-де басталды. Қытайдың Шыңжаң аймағындағы этникалық азшылықтың қысымға ұшырағаны туралы мәселе көтерген белсендіні қолдауға келгендер сот залына сыймай кейбірі дәлізде тұрды.
Сотта төрағалық еткен - Нұр-Сұлтан қаласы Алматы аудандық №2 сотының Меделбаев Нұржан Асанұлы. Мемлекеттік айыптаушы, Алматы аудандық бөлім прокуроры - Мамытханов. Және адвокат - Айман Омарова.
Тергеу орындары Серікжан Біләшқа Қылмыстық кодекстің "Әлеуметтiк, ұлттық, рулық, нәсiлдiк, тектік-топтық немесе дiни алауыздықты қоздыру" бабы бойынша (174-баптың 1-бөлігі) айып таққан. Бұл бап бойынша екi жылдан жеті жылға дейiнгi мерзiмге бас бостандығын шектеу не сол мерзiмге бас бостандығынан айыру жазасы қарастырылған.
Серік Біләштің адвокаты Айман Омарова қылмыстық істің Алматы қаласының аумағында болғанын дәлелдей келе, істің Нұр-Сұлтан қаласында қаралуын заңсыз деп есептейтінін айтты.
Сағат 12:40-та сот шешімі шығып, процесс Алматы қаласы Әуезов аудандық сотына берілді. Енді Серікжан Біләш өзінің тұрғылықті мекен-жайына Алматы қаласы Ақкент ауданында үй қамақта отыратын болады.
