'16 маусым күні сағат 01:19-де Атырау қаласының '101' желісіне М.Әуезов көшесіндегі 'Райхан' қонақүйі өртеніп жатқаны туралы хабарланған. Өрт ғимараттың астыңғы қабатында орналасқан саунадан шыққан. Оқиға орнына жеткен құтқарушылар 3 баланы құтқарып, 31 адамды қауіпсіз аймаққа көшірді, олардың 29-ы бала. Құтқарылған және қауіпсіз аймаққа көшірілген балалар Орал қаласынан жарысқа келген', - деп хабарлайды ҚазАқпарат ҚР ІІМ.
Облыстық жедел жәрдем станциясының басшысы Ерлан Сүйеуғалиевтің айтуынша, қонақ үйге 3 жедел жәрдем бригадалары жіберілді. Зардап шеккен азаматтардың үшеуіне бірден алғашқы көмек көрсетілді. Уланған екі жас футбол ойыншылары мен азаматша облыстық ауруханаға жеткізілді.
'Науқастарға қажет медициналық көмек көрсетілді. Балалар ауруханадан шығарылды. Азаматшаның жағдайы бірқалыпты, өміріне еш зиян туған жоқ', - деп облыстық денсаулық сақтау департаментінің баспасөз қызметі хабарлады.
