Мерт болған азамат төлем терминалында жолақысын төлеп тұрған еді. Жаяу жүргінші 40 метрдей ұшып кетті, денесі бөлшектенген. Ал полицей оқиға орнынан жоғалып кетті.
"Мұсылмандық жолмен шаңырағында бір түнетіп, арулап барып жерлей алмадық", - деді марқұмның туысқандары.
Жүргізуші болып істеген Нұрлан Жүнісовтың денесі бөлшектеніп қалған, мәйітханадан әкеле есік алдынан жөнелткен. Оқиға орнынан қашып кеткен Макинск қалалық желілік полиция бөлімшесінің бастығы болып шықты. Басшылары оны қызметінен шығарып жіберген.
"Көліктегі полиция департаменті бастығының ағымдағы жылғы 27-мамырдағы бұйрығымен Макинка станциясындағы желілік полиция бастығы, майор Роллан Қанғожин ішкі істер органдарынан шығарылды. Сонымен қатар Көкшетау станциясының желілік полиция бөлімінің бастығы атқарып отырған лауазымынан босатылды", - деді ҚР ІІМ Көліктегі ПД баспасөз хатшысы Ләззәт Қасымжанова.
