Төтенше жағдайдың орын алғаны 2021 жылғы 7 қарашада сағат 08.37-де белгілі болды.
"Алдын ала мәлімет бойынша, шахтада 64 жұмысшы болған. 3-К10 алаңында сегіз жұмысшы бар (ақпарат нақтылануда). Сегіз жұмысшының алтауы қаза тапты, екеуі жарақат алды (жағдайлары нақтыланып жатыр). Жер бетіне шығару жұмыстары жүргізілуде", - деді Төтенше жағдайлар министрлігінің ресми өкілі Талғат Уәли.
Оқиға орнына Қарағанды облысы Төтенше жағдайлар департаменті қызметкерлері мен техникасы аттанды.
Оқиғаның мән-жайы мен себептері анықталуда.
"Оқиға орнына ҚР Премьер-министрі Асқар Маминнің тапсырмасы бойынша Төтенше жағдайлар министрі Юрий Ильин бастаған комиссия аттанды", - деді Уәли.
Төтенше жағдайларды жоюға Авариялы-құтқару қызметтерінің "Республикалық орталық штабы" ЖШС (15 қызметкер), ТЖД (үш қызметкер және екі бірлік техника), Апатты медицина орталығы ММ (үш қызметкер және бір техника) күштері мен құралдары тартылуда.
