Заманауи құрылғылар, ашық кеңістік, сөредегі балғын тауарлар, Magnum-кафе, бөлімдердің арнайы түстер арқылы ерекшеленуі, өзіне-өзі қызмет көрсету кассалары жаңа ашылған дүкеннің басты жаңашылдықтары.
Magnum компаниясы Қазақстан Республикасының экология, геология және табиғи ресурстар министрлігінің бастамасын қолдай отырып, 1 желтоқсаннан бастап Алматы және Нұр-Сұлтан қалаларындағы маркет кассаларында пластикалық пакеттерді тегін тарату шарасын тоқтатты. Сондай-ақ дүкендер желісінде бірнеше мәрте пайдалануға болатын шоппер сөмкелер пайда болды.
Жаңа Magnum сауда кешендеріне арналған 2.0 концепциясын Еуропаның ірі ретейлерлерімен серіктес болған голландиялық JDV компаниясы жасап шығарды. Компания өкілі Гюнтер Бауэр жаңа гипермаркетті аралап жүріп, қонақтарға оның ерекшеліктерін түсіндірді.
"Еуропалық ретейл тенденцияларына сай біз тоңазытқыштарға есік орнаттық. Жарық түрін де диодқа алмастыру арқылы қуат көзін үнемдейміз. Мұндай өзгерістердің тек тоңазытқыштар орналасқан бөлімге енгізудің өзі қуатты 40-60 пайыз азырақ жұмсауға көмектеседі",- деді Бауэр.
