Жылдамдық — 25 км/сағ.
Жеке мобильділік құралының жылдамдығын сағатына 25 шақырымға дейін шектеу ұсынылды. Сондай-ақ ең жоғары салмақ шегін 35 келі деп белгілеу жоспарланған. Бірақ ол барлық қос дөңгелекті көлікке қатысты емес, тек жаяу жүргіншілер арасында тротуармен жүретін техникаға әсер етеді.
Жүргізушінің жасы және мінуге болатын орындар
7 жасқа дейінгі балаларға тротуарда, жаяу жүргіншілер және велосипед жолында, жаяу жүргіншілер аумағында жеке мобильділік құралымен жүруге рұқсат етіледі. Бірақ қасында ересек болуға тиіс.
14-тен асқан балалар қос дөңгелекті көлікпен жолға шыға алады, бірақ бірнеше шартты орындауы керек. Біріншіден, жанында тротуар немесе жаяу жүргіншілер жолы жоқ болса және жолдағы ең жоғары жылдамдық сағатына 60 шақырымнан аспайтын болса ғана жолдың жүріс бөлігіне өтуге болады. Екіншіден, жолдың шетімен немесе жүріс бөлігінің оң жақ шетімен жүруі керек.
Самокат қандай көлік?
Электросамокат пен өзге де жеке мобильділік құралдарына қатысты мәселе Ресейде ғана емес, Қазақстанда да күн тәртібінен түскен емес. Біздің елде ІІМ соңғы жылдары мұндай көліктерге әртүрлі баға беріп жүр. Алдымен электросамокатты мопедке теңестіріп, тротуармен жүруіне тыйым салды. Кейін керісінше, оларды жолдың жүріс бөлігімен жүргізбей қойды. Соңғы ақпаратқа сүйенсек, осы мәселені шешу үшін құрылған арнайы топтың жұмыс істеп жатқанына бірнеше ай болыпты, алайда атқарылған істің нәтижесі әлі жарияланған жоқ.
