"Халқымыз егемендіктің қадір-қасиетін жан-жүрегімен сезінеді. Өйткені біз азаттықтың құны қандай екенін жақсы білеміз. Бостандық жолында талай батырларымыз құрбан болды. Қаншама қиын күндер басымыздан өтті. Бірақ халқымыз барлық сынақты қайыспай көтерді", - деп айтты ҚР Президенті Қасым-Жомарт Тоқаев.
Президент елдік жолында жұдырықтай жұмыла әрекет етудің арқасында Қазақстан халқы телегей-табысқа жеткенін атап өтті.
"Төл тарихымыздағы ең күрделі сәттерде халқымыз жұдырықтай жұмыла білді. Бұланты, Орбұлақ және Аңырақай шайқастары – осының айқын дәлелі. Қазақтың елдік жолындағы ерлігі отаршылдыққа қарсы ұлт-азаттық қозғалыстарда айқын көрінді", - деді ҚР Президенті Қасым-Жомарт Тоқаев.
Мемлекет басшысы тәуелсіз ел атану жолында жанын пида еткен арыстар мен ұлт қаһармандарының ерлігі ұрпақ жадынан өшпеуі тиіс екенін баса айтты.
"Біздің бабаларымыз қазақтың дербес мемлекет құрып, еркін өмір сүруге құқылы екенін тарих алдында дәлелдеді. Мыңжылдықтар тоғысатын тұста Азаттық туы көгімізде желбіреді. Ұлттың ең ұлы мұраты – Тәуелсіздікке қол жеткіздік. Сол сәттен бастап Қазақ елінің ұлы көші болашаққа бет түзеді. Халқымыз өз мемлекетін құруға кірісті. Бұл – тарихи әділдіктің орнауы", - дедіҚР Президенті Қасым-Жомарт Тоқаев
